由13年起，我每年都快閃十來次。最癲係今年有次星期六晚11:00 land首爾，星期日08:00比賽，星期一朝早07:00返港。
以下一篇係我執行無限loop快閃馬要注要的事項。
講真丫，有頭髮邊個想做癩痢？
如果我係一年有幾十日假，又或者我一年只跑一兩次海外馬就滿足，我就一定去遠啲，例如歐美玩雙連馬啦~
奈何我無丫嘛，唯有快閃多幾次去止渴止腳痕先。
快閃之前有幾樣野我需要考慮的：
1. 目的
呢隻馬有咩吸引到我非去不可先？又或者我係咪好趕要儲馬數，所以非跑不可？咁當然如何未去過，而我又覺得較特別的賽事，或者果個地方風景好靚，咁都有誘因令我plan去果度。
2. 成本
講真，自從4年前開始廉航盛行，我嘅跑步足跡就遍佈Scoot、Peach、Tiger、Jetstar、Airasia、香港航空和香港快運各航點。
除此之外，近年國內高鐵發展迅速，大陸馬愈來愈多，辦得愈來愈有水準，都係快閃之選。
雖然廉航沒有服務，又delay，但如果唔係廉航成日減價，真係無咁多錢跑海外馬啦！
最平試過400幾蚊來回連稅去名古屋、石垣島和鹿兒島、台中，500幾蚊去東京、大阪、濟洲島、清邁，600幾蚊去新加坡、首爾、檳城、沙巴、KL、曼谷，2000幾蚊就去到墨爾本和悉尼。
登記咗航空公司做member，就知道幾時減價，到時去搶機票，心得係一早諗好目標，入定資料，網上一開賣就要眼明手快去搵和比錢，果斷決定係重點。
買得廉航，要做功課，知佢更改退款規矩，同埋行李限制，仲要有delay buffer，唔好預時間預盡，唔係到時被罰款或被取消航班，就喊都無謂。
咁當然買廉航我亦有時因工或因事不能成行，交咗唔少學費。
除此之外，現在航空公司競爭好大，就算傳統航空公司都成日減價，我最平試過3000蚊有找飛倫敦，去波馬又買到fanfares去new york，所以通常我係見特價心動，就開始搵比賽，促成快閃。
3. 住宿
通常馬拉松前一晚的住宿供應都好緊張，呢項我反而會最先做，尤其是有我會先望望有無機會訂到啲可取消的住宿。
如果要抽籤，或者未落實請到假，都可有走棧。不過我都試過遲咗取消，或者貪平或心急訂咗啲取消唔到嘅住宿。
心得無，就係用盡所有方法網上搜尋，有時要搵返當地網站，有時大會預訂會幫到手，有時要打電話。我很常用airbnb，so far so good，但當然有佢嘅唔好處，有機會再分享。
仲有係快閃好多時要late check in和late/ early check out，廉航仲要有delay，事前一定要同住宿溝通好(尤其是日韓，好多有門禁) 。
4. 報名
攪完一大輪，當然最重要係報比賽，好多人問點搵？ 其實我一開始同大家一樣，用google大神，用英文打地方名，再打marathon，通常都搵到唔少。
除此之外，要國際認可嘅我會搵aims網站(當年仲有機會爭ranking時)，日本就runnet，jtb和sportsentry 網站，台灣就運動筆記。
韓國嘛，好麻煩，將地方名和馬拉松google translate去韓文再搵啦，不過要留意去細賽就係雞同鴨講，我試過連cert都無(其他人即場拎，佢話e 比我之後放飛機) ，完全溝通唔到。
5. 交通
喺外國的士貴過香港的士多多聲，budget tight之下要快閃，真係要查好交通工具。如果交通唔許可就講咩都無用。
初步可以用google地圖search，如果有公共交通顯示就一定無死，最多班次好疏啫。
日本就查好換乘案內。
因為快閃成日通宵去的紅眼航班，通宵返，要查好深宵交通工具。
東京羽田UO 06:25早機我搭過n次，首爾和東京大阪、台北、高雄delay好遲land都試過，正所謂lai 得多， 點都有經驗，如果有人想知心得，下次另開post講。
如果公共交通google地圖查唔到，又點呢？ 其實都有可能有車㗎，例如我某次去美國一個小鎮Chattonooga，google發現無車到，但其實megabus係有巴士直達的，所以要google 再搵清楚。
再唔得咁點？ 我試過上大會網站問，或email大會，有時會有跑友甚至大會肯免費載你一程㗎。
仲有當地嘅旅遊局，通常會比到交通資訊你。
仲有一個方法係搵人share taxi 或包車，或找共乘車。因為快閃時間有限，好多時我會用錢去解決問題，如果花時間摇公車，就失卻快閃真義。
6. 玩樂
雖然係快閃，但我絕對唔會唔觀光或遊覽，否則就失咗旅遊的意義。所以，我會揀地方跑的，唔好玩，無風景，無好野食我唔會去。
當然，咁會燃燒你嘅青春，唔適合慢板嘅人。
因為快閃，通常無時間去當地格價或慢慢再搵玩咩，通常我會網上搵好資料，訂好行程。
例如上年11月跑韓國中央日報馬，正當紅葉期，我星期六一落機就去首爾站join local tour去內藏山睇紅葉，星期日比賽，晚上睇漢江夜景，第二朝就返香港。
又例如今年5月去輕井澤半馬，跑完我立即搬去松本，第二朝上立山黑部，之後晚上回港。
再例如我去布吉，凌晨機到旅館瞓幾粒鐘就去咗潛水tour，第二日跑完，中午去沙灘玩水，下午去玩飛越叢林，第三日玩埋獨木舟跳島遊就半夜返香港。
我知我癲，但快閃，唔代表無得玩喎~
7. 體力恢復
快閃得嘅人，多數一年會跑10隻8隻馬仔。
我本人上年跑咗18隻全馬，仲未計10k，跑樓梯賽，半馬和山賽。13年高峰期我試過連續5年馬，力保sub4和4個鐘左右，中間仲有場有獎金賺下。又試過個半月8隻馬。
快閃，濫跑，但唔代表我可以DNF，或代表我對成績完全無要求。連馬可以set目標低啲，但如果連續幾個賽都可以速度唔跌，可當練習的一部分。
點樣喺紅眼航班和連馬之間積極恢復，避免受傷，都係重點。
紅眼航班到的話，我點都唔瞓機場，就算比錢early check in 都一定要休息，搵按摩店，浸温泉或汗蒸幕都係方法。
仲有賽後盡量第二日recovery run，搵方法温泉或浸浴，同埋連馬之間避免練速度，做好拉筋，搵時間按摩(按摩機、按摩店、自己按) 都係辦法。
8. 放假
我通常會安排Day off或補假去cover快閃馬，真正用假其實不多。若經常快閃，其實就算OT都要確保手上工作完成，我試過上年去美國跑馬前，凌晨1:00點機，我可以晚上10:00仲喺office清手頭工作。
記住，要順利請假，盡量唔好帶麻煩比同事和老闆。平時要抵得諗啲，helpful啲，表現好啲。
如知道有啲日子，譬如我公司每年3月尾和8月都有大function，我都會盡量避免快閃。
盡量唔好同人搶長假，既然都預咗快閃，避免同人搶聖誕新年，農曆年和復活節長假，反正機票成本又高，慳返其他日子去，有家室嘅同事又會感激你。
若真係夾唔到假，唯有放棄行程，唔好硬碰，因為你仲有大把馬可選擇。
所以book酒店要揀可取消，而廉航係可以加錢改機票，但如果加完太貴，咁不如退稅仲化算。
好，講住咁多先，祝大家長閃長有！
沒有留言:
張貼留言