在今個出更表後發現週末有日半時間，於是開始找比賽，最後找到新加坡動感亞洲MSIG 50。
快閃的幾個先決條件，有紅眼航班、有凌晨公交、廉價機票、短飛行時間全部都附合了。
由於要晚上8:00後的航班出發，基本上只有CX，Jetstar和UA選擇，在考慮價錢和合適時間下，最終揀了UA。
去程飛晚上8:20，到新加坡0:15。好彩無揀cx，如果唔係當晚delay到9點幾，休息時間又短咗。
抵步後出埋關都0:58，MRT晨早收咗，快閃要點(一) ：安排好交通。我一早網上book好WTS travel的airport shuttle，到達後到counter確認，等咗10分鐘就上車，約0:40到hostel。
快閃要點(二) 要揀地點適中，價錢合理，而又可凌晨check in的住宿。
地點方面要容易去起點，而airport shuttle可到的。價錢方面，瞓得幾粒鐘，當然唔想比太貴啦。
住hostel係個好選擇，我會比貴少少，揀評價好的，而且房間內床位較少啲的女生房。當晚Bunc Hostel 6人房只有3人入住，雖然有一人間中有少許鼻鼾，但唔影響我睡眠。房價2晚約hkd398，我用埋expedia code 和積分後hkd348。
沖涼後約01:10瞓，約04:15就起身，04:30食野。 快閃要點(三) 準備好你的早餐。
Hostel本身早餐時間06:30-10:00，我兩日都無食過。自己去搭機鐵前去唐記買咗個飯，第二朝喺hostel叮飯食。
早上請hostel call cab，估唔到未食完就到。因為之前問咗半夜好難截的。司機仲問我係咪比賽，因為剛車咗另外一個MSIG職員去Hindhede Walk。半夜的士要附加費，錶顯示10蚊坡紙左右，佢收我20。但如果搭頭班巴士，時間又長，又要時間搵站，去到時間又憫水，咁我寧願比錢賺睡眠時間。
05:15已到場，仲有1小時15分才比賽。因為原先想請新加坡朋友幫忙拎選手包，所以即刻msg搵佢。不過因為溝通誤會，原來佢無幫我拎到。
見朋友未到，就去起點睇50k起步。
突然有人叫我，原來係楚健，我知道佢會參賽，但黑麻麻，唔係佢叫我，一定睇唔到佢！
同佢合照，打打氣，就唔阻佢起步了。50k在5:30出發，都幾多人參加，鳴槍後好一段時間仲有人龍慢慢jog出去。
朋友到咗，知道無號碼布，就去大會問。只有海外選手可以現場拎，但我沒有事前通知，好彩都比我拎。
不過當日暴雨關係，大會忙著改道，又見ambulance問點解未send路線比佢，哈哈，原來賽會都幾混亂。
同朋友起點拍照，寄存行李後就上線。今日忘記帶bar 和gel，只係帶咗大豆果滋棒一條，同埋hostel裝嘅水。。。唯有寄望大會補給。。。但原來頭幾個pt都只有水，直至17k才有蕉和橙，好彩食咗早餐，唔係餓死都似！
06:30起步，以為天光啦，原來仲好黑，無帶頭燈，唯有就住跑，加搏一搏。
本來以為新加坡無咩山，應該好易跑啦，點知原來不停上上落落，加埋行雷閃電落大雨，山路草地變泥槳，玩摔角都幾好玩~
玩到16k，突然大會話因天氣取消，腰斬賽事。但其實無論如何，都要返終點拎行李，見好多跑手short cut馬路走，但我完全唔識路，唯有照返大會pink絲帶跑足全程返去，約9:04完賽。
到終點發現已經好多人返咗，當然啦，short cut嘛，但大會有理無理照頒完賽牌。因為cancel後，唔見有晶片地墊，亦唔再見人抄no.，唔排除有人short cut但照拎到獎。
見到好多人排隊打蛇餅，於是就照排，原來係派完賽tee，但我排到後就只係得返visor。
見好多人拎住盒pasta食，於是問邊度拎，但我去到時剛派完，唯有拎2條蕉，再排隔離拎生果雪條。見到有redbull，但我到時又已派光。
現場有得放相上instagram可即場印照片，但又要set public咁麻煩，無人幫趁。
坐下等埋新加坡朋友返，睇埋朋友頒獎，全場overall 全部是黑朱古力-非洲和尼泊爾特邀選手，應該獎金好豐富吧？
突然見到有meal box refill，即刻衝去排啦，餓死了~
有炸雞飯，正！
食飽飯行返去Beauty world MRT，喺MRT toilet初步沖洗啲爛泥，換衫和拖鞋，多得新加坡toilet有洗patpat設備~ ^^
約12:00返到hostel沖涼，係咁洗呀洗，啲衫攪極都唔掂，結果比咗8蚊洗衫和乾衣。
跟著補眠到3:00，就去食結霜橋喇沙，行去幾分鐘咋，好方便。
然後就去bugis行下，順便想買榴槤蛋卷，不過我忘記了店名，只記得喺馬來文化中心附近，於是搵咗好耐，去到發現裕佳餅店已賣晒關門。
果邊多咗啲步行街，幾好行。
只好行返hostel，約5:30，會合另外兩位新加坡跑友Laichee和Alin搭的士去East Coast食珍寶海鮮。
司機仲問點解去咁遠食，我答因為我係遊客。
好彩朋友book咗海景位，現場所見好多人排隊。本來我地個位可睇海和sunset，但天氣麻麻，有啲雲霞咁。
雖然叫極都無人點菜，直至我催幾次先至有人來，但上菜好快。食完第一道菜，開始落雨，起初見大家無理繼續食，後來太大先搬返入有遮頭的地方，後面係garden view，都唔錯。
食物方面，其實大致水準唔錯，好味。不過蟹就真係無招牌好食啲。
食完飯，我地一齊行下公園，見到個湖有cable拉住個人玩滑水，好似幾得意，下次嚟試下先。
然後經過food court，Laichee仲問我食唔食沙爹和糖水？我答食唔落，飲野就得。結果佢買咗大大杯sugar cane比我。
然後我地就搭巴士返hostel，但落車後仲要行2k，就當飯後運動吧！
約22:45返到房沖涼執野。好彩下午已執好大半，夜麻麻唔駛嘈住roommate啦。
跟住約0:00瞓到02:40，check out時發現counter無人等咗陣，我要拎返deposit呀。02:55出去，airport shuttle已在等候，服務很好，幫我double check去邊個terminal，10座小巴我一個全包車只係13蚊坡紙，抵！
到機場仲有大把時間行duty free，但我主菜係去萬寧執虎標(按摩膏、蚊怕水)，想買班蘭蛋糕但未開，最後去咗玩OSIM免費按摩，仲有去coffee bean買咖啡飲。
原來新加坡機場係上機前先安檢㗎。
06:00準時起飛，新加坡唔夠30小時之旅落幕。
沒有留言:
張貼留言